പാമ്പ് കടിയേറ്റ് വിദ്യാര്ഥി മരിച്ചു
- Kerala
dailyvartha.com
- 0
- 1 minute read
കുമളി: വണ്ടിപ്പെരിയാറില് പാമ്പ് കടിയേറ്റു ആറാം ക്ലാസ് വിദ്യാര്ഥി മരിച്ചു. മഞ്ചുമല ആറ്റോരത്തെ പരേതരായ അയ്യപ്പന്റെയും സീതയുടെയും മകന് സൂര്യ (11) യാണു മരിച്ചത്. കാലില് കണ്ട നീര് കളിക്കുന്നതിനിടെ ഉളുക്കിയതാകുമെന്ന് കരുതി ചികിത്സ തേടിയിരുന്നില്ല. പോസ്റ്റ്മോര്ട്ടത്തിലാണ് കുട്ടിക്കു പാമ്പുകടിയേറ്റതായി കണ്ടെത്തിയിരിക്കുന്നത്.
വണ്ടിപ്പെരിയാര് ഗവ.യുപി സ്കൂളിലെ വിദ്യാര്ഥിയാണു സൂര്യ. കഴിഞ്ഞ 27നു സ്കൂളില്നിന്നു മടങ്ങിയയെത്തിയതു മുതല് സൂര്യയുടെ കാലില് നീരുണ്ടായിരുന്നു. അടുത്ത ദിവസങ്ങളില് സ്കൂളില് പോകാതെ വീട്ടില് വിശ്രമിക്കുകയും ചെയ്തു. അതിനിടെ തിരുമ്മുചികിത്സയും നടത്തി. ഞായറാഴ്ച രാവിലെ ശരീരമാസകലം നീരു ബാധിച്ചതോടെ വണ്ടിപ്പെരിയാര് ഗവ. ആശുപത്രിയില് എത്തിച്ചു.
പിന്നീടു തേനി മെഡിക്കല് കോളജിലേക്കു കൊണ്ടുപോയെങ്കിലും മരണം സംഭവിക്കുകയായിരുന്നു. തുടര്ന്നു നടത്തിയ പോസ്റ്റ്മോര്ട്ടത്തിലാണു പാമ്പുകടിയേറ്റതായി കണ്ടെത്തിയത്. മാതാപിതാക്കള് മരിച്ചതോടെ സഹോദരി ഐശ്വര്യയ്ക്കും ഭര്ത്താവിനും ഒപ്പമായിരുന്നു സൂര്യയുടെ താമസം. പഠനത്തിലും പാഠ്യേതര വിഷയങ്ങളിലും ഒരുപോലെ മിടുക്കനായിരുന്നു സൂര്യ എന്ന് അധ്യാപകര് പറഞ്ഞു.
