ആക്രമിക്കാന്‍ വന്ന കുരങ്ങനെ അലക്സ ഉപയോഗിച്ച് ഓടിച്ച 13കാരിക്ക് ജോലി വാഗ്ദാനം ചെയ്ത് ആനന്ദ് മഹീന്ദ്ര
- National
dailyvartha.com
- 0
- 1 minute read
തന്നെയും സഹോദരിയെയും വീട്ടില്‍ കയറി ആക്രമിക്കാന്‍ വന്ന കുരങ്ങനെ ആമസോണ്‍ അലക്സയുടെ സഹായത്തോടെ ഓടിച്ച പെണ്‍കുട്ടിക്ക് ജോലി വാഗ്ദാനം ചെയ്ത് ആനന്ദ് മഹീന്ദ്ര. ഉത്തര്‍പ്രദേശിലെ ലഖ്‌നൗവിലാണ് സംഭവം. നികിത പാണ്ഡെ എന്ന 13കാരിയാണ് തന്നെയും തന്റെ സഹോദരിയേയും വിര്‍ച്വല്‍ വോയ്സ് അസിസ്റ്റന്‍ഡായ അലക്സയുടെ സഹായത്തോടെ രക്ഷിച്ചത്. വീട്ടിനകത്ത് കയറിയ കുരങ്ങന്‍ ഇരുവരെയും ആക്രമിക്കാന്‍ ശ്രമിക്കുകയായിരുന്നു.
എന്നാല്‍ ധൈര്യം കൈവിടാതിരുന്ന നികിത അലക്സയോട് നായ കുരക്കുന്ന ശബ്ദമുണ്ടാക്കാന്‍ ആവശ്യപ്പെട്ടു. ഉടന്‍ തന്നെ അലക്സ നായയുടെ ശബ്ദമുണ്ടാക്കി. ഇത് കേട്ട് പേടിച്ച കുരങ്ങന്‍ വീടിന് പുറത്തേക്കോടുകയായിരുന്നു. സംഭവത്തെക്കുറിച്ച് വാര്‍ത്ത ചെയ്തത് മഹീന്ദ്ര ഗ്രൂപ്പിന്റെ ചെയര്‍മാനായ ആനന്ദ് മഹീന്ദ്രയുടെ കാതുകളിലെത്തുകയായിരുന്നു. സാഹചര്യത്തെ നേരിടാനായി പെട്ടന്ന് പ്രതിവിധി കണ്ടെത്തിയ കുട്ടിയുടെ കഴിവിനെ പ്രശംസിച്ച് മഹീന്ദ്ര തന്റെ എക്സില്‍ ഒരു കുറിപ്പും രേഖപ്പെടുത്തി.
‘ഇക്കാലഘട്ടത്തിലെ പ്രധാന ചോദ്യം നാം സാങ്കേതികവിദ്യകളുടെ അടിമകളാണോ അതോ യജമാനന്മാരാണോ എന്നതാണ്. സാങ്കേതികവിദ്യയെ നിയന്ത്രിക്കാന്‍ നാം പ്രാപ്തരാണെന്ന് ആശ്വാസം നല്‍കുന്നതാണ് ഈ ദൃശ്യങ്ങള്‍. അസാധാരണമാണ് ഈ പെണ്‍കുട്ടിയുടെ പെട്ടന്നുള്ള ചിന്ത, മനുഷ്യന്റെ കഴിവ് ഗംഭീരം തന്നെ’. പെണ്‍കുട്ടിയെ പ്രശംസിച്ച മഹീന്ദ്ര, വിദ്യാഭ്യാസം പൂര്‍ത്തിയാക്കി ഭാവിയില്‍ കുട്ടി ആഗ്രഹിക്കുകയാണെങ്കില്‍ മഹീന്ദ്ര കമ്പനിയില്‍ കുട്ടിക്ക് ജോലിക്ക് പ്രവേശിക്കാമെന്ന വാഗ്ദാനവും നല്‍കി.
പ്രവാചനതീതമായ ലോകത്ത് മികച്ച നേതൃത്വത്തിനായുള്ള കഴിവാണ് കുട്ടി പ്രകടമാക്കിയത്. അവളുടെ വിദ്യാഭ്യാസം പൂര്‍ത്തിയാക്കിയ ശേഷം, അവള്‍ എപ്പോഴെങ്കിലും കോര്‍പറേറ്റ് ലോകത്ത് ജോലി ചെയ്യാന്‍ തീരുമാനിച്ചാല്‍, മഹീന്ദ്രയില്‍ ചേരാന്‍ അവളെ ബോധ്യപ്പെടുത്താന്‍ സാധിക്കുമെന്ന് കരുതുന്നു’ – എന്നും മഹീന്ദ്ര കുറിച്ചു.
താന്‍ നിലവില്‍ പത്താം ക്ലാസ് പരീക്ഷ എഴുതിയിട്ടേയുള്ളൂവെന്നും ഭാവിയില്‍ ഉറപ്പായും മഹീന്ദ്രയോടൊപ്പം ചേര്‍ന്ന് പ്രവര്‍ത്തിക്കാന്‍ ആഗ്രഹിക്കുന്നുവെന്നും നികിത പറഞ്ഞു. രണ്ട് വര്‍ഷം മുമ്പ് കുട്ടിയുടെ പിറന്നാളിനാണ് കുട്ടിക്ക് വീട്ടുകാര്‍ അലക്സ സമ്മാനിച്ചത്.
