വിജയാഘോഷത്തിനിടെ ഹൃദയാഘാതം; കര്ണാടക ക്രിക്കറ്റ് താരത്തിന് ദാരുണാന്ത്യം
കര്ണാടകയില് നിന്നുള്ള ക്രിക്കറ്റ് താരം ഹൊയ്സാല കെ (34) ഹൃദയാഘാതം മൂലം മരിച്ചു. വ്യാഴാഴ്ച്ച ഏയ്ജീസ് സൗത് സോണ് ടൂര്ണമെന്റ് മാച്ച് കഴിഞ്ഞതിനു തൊട്ടുപിന്നാലെ ബംഗളുരുവിലെ ആര്.എസ്.ഐ മൈതാനത്തുവച്ചാണ് ഹെയ്സാലയ്ക്ക് ഹൃദയാഘാതമുണ്ടായത്.
തമിഴ്നാടിനെതിരായ മത്സരത്തില് വിജയിച്ചതിനു പിന്നാലെ ടീമംഗങ്ങളോടൊപ്പം വിജയാഘോഷത്തിനെത്തിയ ഹൊയ്സാലയ്ക്ക് നെഞ്ചുവേദന അനുഭവപ്പെടുകയും പിന്നാലെ ഗ്രൗണ്ടില് കുഴഞ്ഞുവീഴുകയുമായിരുന്നു. മറ്റു ടീമംഗങ്ങള് സി.പി.ആര് ഉള്പ്പെടെയുള്ള പ്രാഥമികശുശ്രൂഷ നല്കി ഉടന് തന്നെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
മത്സരത്തില് ഒരു റണ്സിനാണ് കര്ണാടക ജയിച്ചത്. 173 റണ്സ് വിജയലക്ഷ്യം പിന്തുടര്ന്നിറങ്ങിയ തമിഴ്നാടിന്റെ ഇന്നിങ്സ് 171ല് അവസാനിച്ചു.
കര്ണാടക ടീമില് അണ്ടര് 25 വിഭാഗത്തെ പ്രതിനിധീകരിച്ചു കളിച്ചിരുന്നയാളാണ് ഹൊയ്സാല. കര്ണാടക പ്രീമിയര് ലീഗിലും കളിച്ചിട്ടുണ്ട്.